shortest horror story tamil version

வீட்டில் இருப்போம்..just stay home.(Covid 19)

covid 19
கோவிட் 19
https://youtu.be/lfQtzn2yQzk

மலேசிய நால்வர் மன்றமும்,கொவிட் 19 ஆணை விடுப்பும்!

                                                                                 

                       தற்போதைய கொவிட் 19 விடுப்பில் இருக்கும் நம்மில் பலருக்கு விடுமுறை !ஆனால் உலக மக்களுக்காக,நாட்டு மக்களுக்காக இராப்பகலாய்  போராடிக்கொண்டிருப்பது மருத்துவத்துறை,காவல்துறை இலாகா,தூய்மைபணியாளர்கள் மட்டுமின்றி மிக மிக முக்கிய பங்காற்றி வருவது  சமய இயக்கங்கள் என்பது தான் இன்னுமொரு மிகப்பெரிய உண்மை!ஆம் , இதை நான் அவசியம் இங்கு  பதிவு பண்ணியே ஆகவேண்டும்!
                                                                           

                         அது எங்களைப்போன்ற சிலருக்கு மட்டுமே கிட்டிய வரம் என்றுதான்  கூறுவேன்.ஆமாம் ,தற்போதைய சூழலில் வீட்டில் தனிமைப்படுத்தப் பட்டிருக்கும் ,உலக மக்கள் அனைவரும் எதையோ நினைத்து,ஏங்கிக்கொண்டு  பயந்த நிலையில் இருக்கிறோம். முடிந்து கொண்டிருக்கும் மளிகைப்பொருட்கள்,குறைந்துகொண்டிருக்கும் பணம்,தடை செய்யப்பட்ட கல்வி, வெளி சுகங்களை அனுபவிக்க முடியாத சூழல் என, ஒவ்வொரு தனிமனிதனுக்கும் இப்படி ஒரு பட்டியலே இடலாம்!
                                                                                   

   
                            இந்த காலக்கட்டத்தில்,நிறைய சோகங்கள் இந்த உலகை உலுக்கிக்கொண்டிருந்தாலும்,அதனைத் திசை திருப்பி,அனைவரையும் ஒருமித்தச்  சிந்தனையில் இட்டுச் செல்ல ,சைவ சமய இயக்கத் தலைவர்களும் அதன் உறுப்பினர்களும் போடும் உழைப்பையும் பாராட்டியே ஆகவேண்டும்! !அவர்கள் யாவரும்,பிறர்  காணும் வண்ணம் வேலைச்  செய்யவில்லை என்றாலும் பொதுமக்கள் பயனடைய வேண்டும்,அது மட்டுமின்றி இந்த கொடிய தொற்றுநோயிலிருந்து  நம் உலகம் விடுபட வேண்டும் என்ற ஒரே எண்ணத்தில் ஒவ்வொருவரும் அயராது செயல்படும் விதம் ,சிரம்தாழ்த்தி வணக்கம் சொல்லியே ஆகவேண்டும்.
                                           

                         அந்த வகையில் ,இவ்வேளையில் அடியேன் பல சைவ சமய இயக்கங்களின்(புலனத்தின்) வழி    பயனடைந்து வருகிறேன் என்றாலும், முழுமையான  சமய ஆசிரியர் பயிற்சியை மேற்கொண்டு, என்னையும்  பட்டைத் தீட்டி ,சைவ சமயத்துக்குப்  பெரியதாய் ஒன்றும் இல்லையென்றாலும் ,ஏதோ சிறியதாய் சில நல்ல காரியங்களைச் செய்ய ஊன்றுகோலாய் இயங்கும்  மலேசிய நால்வர் மன்றத்தை இங்கு  குறிப்பிட்டுச் சொல்ல வேண்டும்.
                               
                            மலேசியாவில் தற்போது  செயல்படும் ,பல சைவ சமய இயக்கங்களில் ஒன்றான  மலேசிய நால்வர் மன்றத்தின் தேசிய தலைவரும்  அவர்தம் பொறுப்பாளர்களும்  தங்களின் தன்னார்வ முயற்சியால் பல பயனுள்ள நடவடிக்கைகளை மேற்கொண்டு வருகின்றனர்.ஆமாம் நண்பர்களே !வீட்டு வேலைகள்,அலுவலக வேலைகள் என உழன்றுகொண்டிருக்கும் எங்களைத் தன்  வயப்படுத்தி ,நம் நாட்டில் ந.க.ஆணை அறிவிப்புச் செய்த நாள் முதல் இன்று வரை ,ஒரு தேடலையும் ,அதனால் ஏற்படும் ஆர்வம் மற்றும் மகிழ்ச்சியையும்  இங்கு குறிப்பிட விரும்புகிறேன்.
                                       

                             புலனத்தின்  வழி ,நாடெங்கிலும்  வாழும் எங்களை இணைத்து,  இறைசிந்தனையில் மூழ்கச்செய்து   மற்றும் அதைச் சார்ந்த நடவடிக்கைகளையும் ஏற்படுத்திக் கொடுக்கும் , நால்வர் மன்றத்தின் தேசிய தலைவரான டாக்டர்  திரு.பாலகிருஷ்ணன் ஐயா அவர்களின் தொண்டு அளப்பரிய ஒன்று.தினமும் சைவ சமயம் சார்ந்த தகவல்கள்,திருமுறைகளை ஆராய்ந்து,அதை அப்படியே பதிவிடாமல் ,ஒரு சொற்பொழிவு போல ஒப்புவிக்கும் தலைவர் திரு.பாலகிருஷ்ணன்  அவர்கள்,  ஓர் இளைஞனுக்கு ஈடாக செயல்படுகிறார் என்றுதான் சொல்லவேண்டும்.
                                                                         

                             இடைவிடாத ஐயாவின்   குரல் பதிவு ,மேலும் தினமும்  அனைவரையும் ஒருங்கிணைத்து ,அவரவர் குடும்பத்துடன் கூட்டுப்பிரார்த்தனைகள்  செய்ய ஊக்குவித்து ,அதை அனைவரும் கடைப்பிடித்து வருவதும் அந்த இயக்கத்தின் வெற்றி எனலாம்.
வெறும் கேட்டல் மட்டுமே  என்றில்லாமல்  வாசிப்பு பழக்கத்தையும் ஊக்குவிக்கும் வண்ணம்  சமயபுதிர்களையும் தயாரித்து, உறுப்பினர்களிடையே ஆரோக்கியமான போட்டிகளை உருவாக்கி ,புத்தகங்கள்,இணைய தேடல்கள் என எங்களை இந்த இக்கட்டான சூழலிலும் போரடிக்காமல் இயங்க வைத்துக்கொண்டிருக்கிறது இந்த இயக்கம்.
                                                                           

              அந்த இயக்கத்தில்  இணைந்து  பயனைடைந்து வரும் 100க்கும்  மேற்பட்ட உறுப்பினர்களில் அடியேனும் ஒருவள் என்பதுதான் எத்துணை மகிழ்ச்சி?குழுவில் உள்ள ஒவ்வொருவருவர்  மனதிலும் பிறர் நலம் காண  வேண்டும் என்ற எண்ணங்களை இடைவிடாமல் விதைத்து   வரும் ஐயாவுக்கு கோடி நன்றிகள்!எங்கள் பொழுதினைச்  செவ்வென கழிக்க ஏதுவாக இயங்கும் இறைவனின்  கருவியாக விளங்கும் மலேசிய நால்வர் மன்றத்துக்கு  இந்த வாய்ப்பினைப் பயன்படுத்திக்கொண்டு  மன்றத்தின் தேசிய தலைவருக்கும் ,செயற்குழு  உறுப்பினர்களுக்கும் மேலும் அந்த இயக்கத்தில் உள்ள அனைத்து ஆசிரியர்களுக்கும்  நன்றியைக் கூறிக்கொள்கிறேன்.
                                                                         

                                       தன்  கடன் அடியேனையும் தாங்குதல் ,

                         என் கடன் பணிசெய்து கிடப்பதே!
                                                                             

                 

தனிமையை இனிமையாக்குவோம்!

               நாள் என்ன செய்யும்?கோள் என்ன செய்யும்?கொடுங்கூற்று என்ன செய்யும்?என்று ரொம்ப தைரியமாய் ஊர்குருவி போல சுந்ததிரமாய்  வலம்  வந்த, அனைத்து உலக மக்களையும் இப்போ COVID  19 என்றழைக்கப்படும் தொற்றுநோய் புயல்போல துரத்தி  வருகிறது. சைனாவில், வூஹான் என்ற இடத்தில் உருவாகிய இந்த நோய்,கொரோனா என்றழைக்கப்படும் கொடிய வைரஸ் தாக்கத்தினால் ,பல உயிர்களை பறித்துக்கொண்டது.உலகத்துக்கே மருட்டலாக இருந்து வரும் அந்த தொற்று நோய் ,நம்மைத் தொற்றிக்கொள்ளாமல் இருக்க உலக நாடுகள் பல, ஊரடங்கு மற்றும் நடமாட்டக்  கட்டுப்பாட்டு  ஆணை என  பொது மக்களை, அவர்கள் நலம் காக்கும்  எண்ணத்தில் தத்தம்  வீடுகளில் தனிமைப்படுத்தியுள்ளது .
                                                               

                தனிமைப்படுத்தப்பட்ட சில நாட்களிலே ,நமக்குள் ஒரு விரக்தி,கோபம்,திருப்தியின்மை .  தொற்றுநோய் பரவும் பயத்தில் இருக்கும் நமக்கு ,இன்னுமொரு கொடிய  நோய் தொற்றிக்கொண்டது என்றால் , இந்த தனிமைப்படுத்தப்பட்ட சூழல்தான்! பலருக்கும் பலவித மன உளைச்சல்கள்,ஏக்கங்கள். நினைத்த இடத்துக்குப் போக முடியவில்லை, ஆசைப்பட்டு எதையும் போய் சாப்பிடமுடியவில்லை,வேண்டியவர்கள் வீட்டுக்குப் போக முடியவில்லை,பள்ளிக்கூடம் போக முடியவில்லை,காலேஜ் போகமுடியவில்லை,பல்கலைக்கழகம் போகமுடியவில்லை,வேலைக்குச் செல்ல முடியவில்லை என ஒரே புலம்பல். நம் நிலைமையே இதுவென்றால்?நம் பிள்ளைகளின் நிலை என்னவாக இருக்கும்?இந்த நிலை தொடர்ந்தால் ,நம்மில் பலரும் மனநோய்க்கு ஆளாகிவிடுவோம் என்ற அச்சம் உறுத்துகிறது!
                                                                         

             உல்லாசமாய் வார இறுதி நாட்களில் ஊர் சுத்தி பழகிய பிள்ளைகள்,வாரத்தில் ஒரு நாள்  வெளியில் சாப்பிடும் குடும்பங்கள் என பழகிபோன நாம்,தற்போது கையில் விலங்கிட்டது போல் முடங்கிக்கிடக்கிறோம். நாளுக்கு நாள் செய்வதறியாது ,உணவு உறக்கம் என்று சோம்பேறிதனத்தை விலை கொடுத்து வாங்குவது  போல ஆகிவிட்டது.அந்த சூழலை மாற்றியமைக்க வேண்டிய கட்டாயத்தில் பெற்றோர்களாகிய நாம் உள்ளோம்! இக்கட்டான சூழலை ,இனிமையான சூழலாக உருவாக்குவது ஒரு சவால்தான்.ஆனால் அந்தச் சவாலை நாம்  ஒரு கலையாக உருவாக்கலாம்.
                                                                                       

                                                 
                 அந்த வகையில் நாம் என்னெவெல்லாம் நம் பிள்ளைகளுக்குச் செய்து கொடுக்கலாம்?நல்ல வழியில் எப்படி பொழுதை  போக்குவது  என்பதைக் கற்றுக்கொடுக்கலாம்.முதன்முதலில் ஒன்றை நம் பிள்ளைகளுக்கு வலியுறுத்துங்கள்.பொதுவாகவே வீட்டில் இருந்தால் ,நம் மகிழி கருவியாக செயல்படுவது  தொலைபேசி,தொலைக்காட்சி  அல்லது கணினி!இதுதான் நம் பிள்ளைகளுக்கு பெரிய விளைவுகளைக் கொடுக்கின்றன .இது ஆய்வில் கூறப்பட்ட உண்மைகள். அந்த கர்மங்களை ஒரு பக்கம் வைத்துவிட்டு,சில யுக்திகளைக்  கையாள்வோம்.
                                                                           

               நம் பாரம்பரிய விளையாட்டுகள் பலவும்  நிறைய திறன்களைக் கொண்டவை,பயனுள்ளவையம் கூட.அதில் ,கண்ணாமூச்சி ரே,ரே ,எலியும் பூனையும்,ஒரு குடம் தண்ணி ஊத்தி தட்டாமாலை,தட்டாங்கல் கிச்சு கிச்சு தாம்பாளம் ,குலை குலையாய் முந்திரிக்காய்,பரமபதம்  என சொல்லிக்கொண்டே போகலாம்.இவற்றில் ஏதாவது ஒன்றினை ஒரு நாளைக்கு அறிமுகப்படுத்தலாம்.அவர்களுக்கு அவைகள் பிடிக்குமா என்ற சந்தேகம் வருவது நியாயம்தான்.ஆனால் அனைத்துச் செயல்களுக்கும் ,ஒன்று பயிற்சி ,அடுத்து  முயற்சி!பெற்றோர்களே! இப்படி ஒரு விடுமுறை இனி அமையுமா? என்பது கேள்விக்குறிதான்!உள்ளங்கையில் உலகத்தை வைத்துக்கொண்டு,மேலை நாடுகளின் மோகத்தை நாமும் பின்பற்றுகிறோம்.தொலைத்தது போதும் ,அதை மீட்டு எடுக்கவே இந்த ஊரடங்கு ,ஆணை(விடுமுறை) என எடுத்துக்கொள்வோமாக.
                                                                                           

                  பிள்ளைகளுக்குக்  கதை சொல்லுங்கள்,கதை கேட்டு வளரும் ஒரு குழந்தை ஒரு நல்ல படைப்பாளியாக உருவாகிறது.தயவு செய்து,சீரழிக்கும்  டிவி சீரியல் வேண்டாமே! பாடல் போட்டி ,புதிர் போட்டி நடத்துங்கள்.பொது அறிவு கேள்விகளை முன் வையுங்கள்.ஓவ்வொருவருக்கும் ஒரு தனித்திறமை இருக்கும்.நடனம் ஆட வைத்துப்பாருங்கள்.விடுமுறை கழிந்து, பள்ளி போகும் அவன்/அவள் ,ஏதாவது மாற்றத்தைக் கொண்டு செல்லட்டும்.
                                                                           

                            ஆங்கிலத்தில் 'கோல்டன் டைம்' என்றழைக்கப்படும் . குடும்பத்தினரோடு அமர்ந்து உணவு உண்ணும் பண்பாட்டினை , உருவாக்கிக் கொடுங்கள்.இந்த சமயத்தில்,நம்மிடையே குறைந்து வரும்  வாசிக்கும் பழக்கத்தை அதிகரிக்கச் செய்வதுதான் இன்னுமொரு சிறப்பு அம்சம். அவர்கள் விரும்பும் விளையாட்டுகளை  விளையாட வசதிகளை ஏற்பாடுச்  செய்து கொடுங்கள்.அவ்வப்போது உலக நடப்புகளை எடுத்துச்சொல்லுங்கள்.குடும்பமாக அமர்ந்து செய்திகளைப்  பார்க்கலாம்.மரண செய்திகளைக்  கேட்கும்போது
ஒவ்வொரு உயிரின் மதிப்பை உணர்த்துங்கள்.
                                                                                       

                                         இறுதியாக நோயற்ற வாழ்வே குறைவற்ற செல்வம் என்ற பழமொழிக்கு பொருள் யாது என்பதை, இந்த கொரோனா வைரஸை மிகச்சிறந்த உதாரணமாக கூறுவோம்.தனிமனிதனுக்கு ஒரு நோய் என்றால் அவன் வசதிக்கேற்ப அதை குணப்படுத்தலாம்.உள்ளூரிலோ அல்லது வெளியூரிலோ சிகிச்சைப்  பெற்றுக்கொள்ளலாம்.ஆனால் தற்போது நாம் எதிர்நோக்கியுள்ள கொவிட் 19 நோய் உலகத்தையே புரட்டிப்போடுது.மனதளவில் எப்படி நம்மை நாம் ஆறுதல் படுத்திக்கொள்வது,இறைவழிபாடு ,பிரார்த்தனைகள் இதில் எந்த அளவு நம்மை பக்குவப்படுத்துகின்றன என்பதை அவசியம் அவர்கள் கவனத்திற்கு கொண்டு செல்லுங்கள்.பெற்றோர்களாகிய நாமும் குறைந்த பட்சம் ஒருவேளையாவது  நம்மை இறைவழிபாட்டில் ஈடுபடுத்திக்கொள்ள இந்த 'ஓய்வு நேரம் ' கிடைத்துள்ளது என்று நினைத்துக்கொள்ளவோம்.
                                                                           

                மொத்தத்தில்  ஊருடன் கூடி வாழ் என்ற வரிகளுக்கு ஏற்ப நாம் அனுபவிக்கும் தற்போதைய  நடைமுறை வாழ்க்கை ,பிணி,மூப்பு ,சாவு எப்படி அனைவருக்கும் சமமோ ?அதுபோல,உலக குடி மக்கள் அனைவரும் இன்றைய நாளில் ஏதோ ஒரு வழியில் ஒரேமாதிரியான வாழ்க்கையைத்தான் அனுபவிக்கிறோம் என்ற சமத்துவ விழிப்புணர்வை ஏற்படுத்துங்கள்!அரசு ஆணையை மனதிற்கொண்டு செயல்படுங்கள்.உலகம் உனக்கு என்ன செய்தது என்று யோசிக்காமல் ,உன்னால் இந்த உலகுக்கு என்ன செய்ய முடிந்தது என்று மாத்தி யோசி!
                                                                                           

                                                             

விடைகொடுக்க மனமில்லை!

       இதை நான் சொல்லியே ஆகணும்!
2018 இறுதியில், ஒரே குழப்பத்தில் இருந்தேன்.எல்லாம் சரியாகிவிடும் என்ற குட்டி தைரியத்தில் கால் எடுத்து வைத்தேன்!நம்மைப்பிடித்த பாதி தொல்லை தீர்ந்தது என மனதைத் தேற்றிக்கொண்டேன்!
        2019 முற்பகுதியில், ரொம்பவே போராட்டம்.நீயா?நானா? என ஒருபுறம், பணப்போராட்டம் ,தீராத சளிகாய்ச்சல் என அனைத்தையும் ஒவ்வொன்றாக எதிர்கொண்டு வந்தேன்!
அரைவருடம் கழிந்தது!அப்போதும் போராட்டம்!
           மாதங்களில் எனக்குப்பிடித்தது அக்டோபர் மாதம்(காரணம் நான் சின்னைப்பிள்ளையாக இருக்கும்போது அக்டோபரில் தொடங்கும் நீண்ட பள்ளி விடுமுறை,தீபாவளி,பாட்டி வீடு பயணம் இப்படி சில குட்டி குட்டி மகிழ்ச்சிகள் வரும்  என்பதால்)!
                அக்டோபரில் கால் எடுத்து வைத்தேன்,!ஒவ்வொரு பிரச்சனைகளாக கழிந்தது!கொஞ்சம் நிம்மதியுடன் உலா வந்தேன்! நவம்பர் பிறந்தது!பள்ளி விடுமுறை, மகனின் பள்ளி வாழ்க்கையில் இறுதி அரசு தேர்வு முடிந்தது,வீட்டில் சுபகாரிய பேச்சுக்கள் என அடுக்கடுக்காய் மகிழ்ச்சி!
             ஒருவழியாக டிசம்பர் வந்தது!அக்கா வீட்டில் நான் திட்டமிட்டதுபோலவே சுபகாரியம்,ஆசிரமத்தில் வழிபாடு,கோவை குடும்ப சந்திப்பு என தொடர் மகிழ்ச்சி!எல்லாத்துக்கும்
 மேலே நானும் பிள்ளைகளும் திட்டமிட்டபடி  இந்திய சுற்றுலா!
நினைத்ததுக்கும் மேலே மகிழ்ச்சியாய் அமைந்தது சுற்றுலா!
          மிகுந்த திருப்தியுடன் நாடு திரும்பினேன்!ரொம்ப நாட்களாக காலைச் சுற்றிய பாம்பு போல ஒரு பிரச்சனை!நாடு திரும்பியவுடன்,நான் எதிர்ப்பார்த்தது போலவே எந்த மனஸ்தாபங்களும் இல்லாமல் என்னை விட்டு அதுவாகவே விலகியது!இதைவிட வேற என்ன வேண்டும்?
                (தமிழ்நாடு செல்ல திட்டமிட்டதன் முதல் காரணம் ,கேரளா சென்று திருச்சூரில் அமைந்துள்ள திருஅஞ்சகளம் தலம் சென்று சாமி தரிசனம் பார்க்கவேண்டும் என்பதே!அதேப்போல அந்த தலம் சென்று தரிசனம் கண்டு கோவைச் சென்றோம்!அந்த மண்ணை மிதிப்பதே பெரிய விசயம்!தலம் செல்வது மிகவும் புனிதமான ஒன்று!சாமி தரிசனம் இன்னும் சிறப்பு!இனி எல்லாம் செல்விம்மாவுக்கு சிறப்பு  என பேரூர் ஆதினம் , குரு மகா சன்னிதானங்கள் மற்றும்  டாக்டர் ஜெயபிரகாசம் ஐயா கூறியது ரொம்பவே உண்மை என உணர்ந்த தினம் 31/12/19!)
ஆகவே மனமின்றி விடைகொடுக்கிறேன் 2019 ஆண்டுக்கு

ஞாயிற்றுக்கிழமை என்றாலே!

                                                                                     
                காலையில் அம்மாவின் திட்டும் குரல்.'சீக்கிரமா எழுந்து வேலைகளை முடிச்சிட்டு அப்புறம் மதியம் ஓய்வெடுக்க வேண்டித்தானே?அப்படி என்ன எழவு தூக்கம் வருமோ உங்களுக்கு?'இன்னிக்காச்சும் நிம்மதியா தூங்க விடுங்கம்மா!இது எங்களின் சோகக்குரல்.காலைப்பசியாறை தயார் செய்யும்   சத்தம் காதில் விழும் வரை சத்தமாய் செய்வார்கள் அம்மா.அப்போதாவது நாங்கள் எழுந்து வெளியே வருவோம்  என்ற எதிர்பார்ப்பில்!

        எழுந்திரிக்க தாமதம் ஆனால் ,அம்மாவே கோபத்தில் 'சரக்..சரக் .'என்று துணி துவைக்கும் சத்தம் !இனியும் தூங்கமுடியுமா?எழுந்தவுடன் நேராய் ,டாய்லெட்டில் தான் முழிக்கவேண்டும்.அதுக்கு முன் ,இப்போவெல்லாம் போனை நோண்டுவதுபோல,அப்போவெல்லாம் ரேடியோவை நோண்டி ,வேண்டிய சேனலை  வைத்துவிட்டு, இசையோடுதான் வேலைத் தொடங்கும்.அடிவிழும்போது பக்கத்துவீட்டில் கேட்காமல் இருக்க இதுவும் ஒருவகை யுக்தி!மானப்பிரச்சனையாச்சே!

         குடும்பத்தில் உள்ள அக்கா தங்கச்சிகளோடு ஏட்டா போட்டி .துணி துவைத்தல்,வீடு பெருக்கல்,படுக்கையைச் சுத்தம் செய்தல்,பாத்திரம் கழுவுதல் என பட்டியல் நீண்டு கொண்டே போகும்.'நான் போனவாரம் துணி துவைச்சேன்,இந்த வாரம் நீ செய்.நான் உன் வேலையைச் செய்யறேன் .'ஓ !வாராவாரம் நானேதான் இந்த வீட்டில் செஞ்சி தொலையணும் ?இப்படியே  எங்கள் பொழுது புலரும்.தேவை ஏற்பட்டால் துடைப்பம்,ஆப்பக்கரண்டி மற்றும் சில ஆயுதங்களை அம்மா கையாண்டு எங்கள் போரை ஒரு முடிவுக்கு கொண்டுவருவார்!வீட்டில் உள்ள அத்தனை கிடாக்களின்(உடன்பிறப்புகள்,மாமா பையன்,சித்தப்பா பையன்)  சப்பாத்துகளையும் துவைச்சி சாகணும்!நான் தான் அதுக்குப்பொறுப்பு....பருப்பு!

         பிறகுதான் குளியல்,வழிபாடு அப்புறமாத்தான் பசியாற முடியும்.அதிலும் வீட்டில் உள்ள ஆண் பிள்ளைகள் உண்ட பிறகுதான் மிச்சம் நமக்கு!அதையெல்லாம் வெற்றிகரமாய் பதுக்கி வைப்பதில் அம்மா தீவிரவாதி!மதியம் ஆகிடும்!சமையலுக்கு ரெடி பண்ணவேண்டும்.அம்மா சமைப்பார்.சுவையான நிம்மதியான சாப்பாடுதான் !கண்டிப்பாக கோழிக்குழம்பு,மீன் குழம்பு,ஒரு வகை கீரை பிரட்டல்.(ஞாயிற்றுக்கிழமை மெனு).நாங்கள் சமைக்கத் தொடங்கும் வரை ,அம்மாவின் சமையால்தான் ருசியும்..சுவையும்!

          சாப்பிட்டவுடன் ,அங்கே நமக்காக காய்ந்து போய் கிடைக்கும் எச்சில் பாத்திரங்கள்!அடுத்து அதைக் கழுவிப்போட ஒரு சண்டை!அம்மா நல்ல மூட்டில் இருந்தால் ,மாலை ஏதாச்சும் பலகாரங்கள் மற்றும் தேநீர்!மாலையில் மீண்டும் துணி மடிக்கவேண்டும் ,சமையல்களை சூடு பண்ணி வைக்கவேண்டும்!அக்காக்கள் வேலைக்குப்போவதால் ,அவர்கள் தோழிகளைச் சந்திக்கபோறேன் அல்லது மாப்பிள்ளையுடன் சந்திப்பு என கிளம்பிவிடுவார்கள்.நானும் தங்கையும் பாதிக்கப்படட சங்க உறுப்பினர்கள்!

          இரவாகி விடும் .எல்லோருடைய உடைகளையும் ஐயன் பண்ணி மீண்டும் செத்து செத்துபிழைக்கவேண்டும்!பள்ளிக்குப்போகும் வரை ,வீட்டுப்பாடங்கள் என நாளைய வேலைகள் தயாராகும்.வேலைக்குச் சென்றபின்பு ,ஒரே ஒரு மாற்றம் வந்தது! அதாவது ஹொம்வேர்க் செய்யவேண்டியதில்லை.மற்ற எல்லாமே செய்தாகவேண்டும்.இரவு வானொலியில் ஒலியேறும் பழையபாடல்கள் , ஒருபக்கம் சோகமாய் கேட்கும்.காரணம் மீண்டும் நாளைக்கு சீக்கிரம் எழவேண்டுமே!
(இவையாவும் திருமணத்துக்கு முன்!)

       ஆனால் இப்போ மேற்கூறிய அனைத்தையும் நானே செய்யவேண்டிய கட்டாயம்!  ஒரே ஒரு சுதந்திரம்...என் வீடு..என் விருப்பம் .எப்போ செய்யத்தோணுதோ (சிலவேலைகளை )அப்போ செய்வேன்.எனக்கு யாரும் கட்டளையிட முடியாது!                         
                                                                       

ஆனால் சத்தியம் பண்ணிச் சொல்கிறேன்.தி.முவில் விருப்புவெறுப்பு  அதிகம் என்றாலும் அதுதான்  தான் அழகிய அனுபவங்கள்!(எனக்கு மட்டும்தானா?) 

சளி ,காய்ச்சல் போல ஆகிவிட்ட சிறார்கள் பலாத்காரம்!

                                                                           

                 எங்கள் பள்ளிக்காலங்களில் கற்பழிப்பு,பலாத்காரம் போன்ற செய்திகள் எங்கோ ஓர் இடத்தில் அல்லது எதோ ஒரு நாட்டில் நடந்துகொண்டிருந்தது.ஆனால் சமீப காலங்களாக  , 6 வயது சிறுமி பலாத்காரம் ,8 வயது சிறுமி பாலியல் துன்புறுத்தல் என்ற பல செய்திகள்  ,அதுவும் கூட்டாக சேர்ந்து பாலியல்  தொல்லை என்ற அருவருப்பான செய்திகள் அதிகமாகவே நம்மைச் சோர்வடையச் செய்துள்ளன.சில செய்திகள் சித்தரிக்கப்பட்டவை என்று கேள்விப்பட்டாலும்,இப்படியெல்லாம் நடக்குமா?என்பதே வினாவும் ஆச்சரியமும்!

             இன்று மாலை (17/7/2018) ,சென்னையில் நடந்த அந்த கேடுகெட்ட செய்தியைக் கேட்டு மனம் நெகிழ்ந்துபோனது!அலுத்துப்போனது,என்றுதான்  சொல்ல வேண்டும்.மாற்றுத்திறனாளியைக் , கூட்டாக சேர்ந்து அலங்கோலப்படுத்தியிருக்கும் நம் மனித  இனம்!ஒருநாள் அல்ல 7 மாதங்கள்..!சில மாதங்களுக்கு முன்புதான் 8 வயது சிறுமி கோவிலில் ,கூட்டணியாக அசிங்கப்படுத்திய விஷயம் உலகை உலுக்கிச் சென்றது!அந்த சம்பவமே இன்னும் நெஞ்சை விட்டு நீங்காத நிலையில் மேலும் செய்திகள் !

              எதை நோக்கி போகிறோம்? இப்போ யாருக்கு எந்த விழிப்புணர்வு தேவை?எங்கே தவறு?எப்படி  தடுப்பது? குழந்தைகளிடம் எப்போதும் 'குட் டச், பேட் டச்' எது என்பதை வலியுறுத்திக்கொண்டே இருத்தல்  மிக மிக அவசியம்.குழந்தைகளின் பாலியல் உறுப்புகளை பிறர் தொட அனுமதிக்கக்கூடாது என்று அடிக்கடி நினைவுறுத்திக்கொண்டே     இருப்பதுவும் நம் அனைவரின் கடமை!ஒரு குடும்பத்தில் தாயாக இருக்கும் ஒவ்வொரு பெண்ணுக்கும் அந்த பொறுப்பு கட்டாயம் இருக்கவேண்டும்.ஒவ்வொரு தாயும் அவள் குழந்தைகளுக்கு ஒரு நல்ல தோழியாக இருப்பதுதான் சில பிரச்சனைகளைக் கண்டறிய முக்கிய அம்சமாக அமைகிறது.இது நம் அனுபவத்தால் கண்டறியப்பட்ட விஷயமும் கூட!
             
             நல்ல தோழியாக இருக்கும் பட்ஷத்தில் ஒரு தாயிடம் அவள் குழந்தைகள் தைரியமாக எதையும் பேசுவார்கள்.தனிமையை விரும்பும் சிறார்களை கவனித்த்துக்கொண்டே இருப்பது பெற்றோர்கள் மற்றும் உடன்பிறப்புகளின் தலையாய கடமை!குழந்தைகளிடம் எப்போதும் நாம் பள்ளியில் அறிவுறுத்தும் ஒரு முக்கிய விஷயம் என்னவென்றால் 'உனக்கு பிடிக்காத செயலை உனக்கு யாராவது செய்தால் ,உடனே அம்மாவிடம் சொல் ,அம்மாவுக்கும்  சரி அப்பாவுக்கும் சரி  வேண்டிய உறவுகள் என்றால் அவர்கள்  உனக்கு செவிசாய்க்க மாட்டார்கள். அங்கே பதில் இல்லையென்றால் உடன்பிறப்புகளிடம் சொல்,யாரும் கேட்கவில்லையென்றால் பள்ளியில் ஆசிரியரிடம் போய் பேசு.நிறைய ஆசிரியர்கள் இருப்பார்கள் ,யாரேனும் ஒருவராவது உனக்கு உதவி செய்வார்கள்.

                 அனைத்து ஆசிரியர்களும் ஒரு மாணவனையோ அல்லது மாணவியையோ புரிந்து வைத்திருக்க மாட்டார்கள் ஆனால்  வகுப்பு ஆசிரியர் ஒரு குழந்தையை  நன்கு அடையாளம் கண்டு வைத்திருப்பார்,வைத்திருக்க வேண்டும்!குழந்தைகளைப்  பார்த்த மாத்திரத்தில் ,அவர்களின் முகபாவனையை கண்டறிந்து அதற்கேற்றாற்போல் செயல்படும் திராணி ஒவ்வொரு ஆசிரியர்களுக்கும் உண்டு என்பதில் ஐயம் இல்லை!

                  யாரைக் குற்றவாளிகள் என அடையாளம் காண்பது?எப்படி வகுப்பு நடத்தி அவர்களைத் திருத்தப் போகிறோம்?திருடனாய் பார்த்து திருந்தாத பட்ஷத்தில்!சமயம் என்பது ஒழுக்க நன்னெறி ,சமயக்கல்வி மூலம் சிலவிஷயங்களைக் கொண்டு புகுத்தலாம் என்றால்  சில சமயபோதகர்களின் அட்டகாசமும் அண்மைய காலமாக வெறுப்பைக் கொடுக்கிறது.ஒருவேளை சின்னஞ் சிறுவயசிலிருந்து குழந்தைகளுக்கு சில விஷயங்களைக் கற்றுக்கொடுக்க வேண்டிய நிர்பந்தத்தில் காலம் நிற்கிறது போல!

                 குற்றவாளிகளுக்குத் தண்டனை என்று கடுமையாக்கப்படும்?அரசுதான் முடிவெடுக்கவேண்டும்.யுக்திகளைப் பொதுமக்களாகிய நாம் மறைமுகமாக சொல்வோம்,செயல்படுத்துவது அவர்களின் கையில்!  எது எப்படியோ ,அண்மைய செய்திகளைக் கேட்டு மனம் உடைந்து போய்க்கிடக்கும் நாம் ,அந்த பாதிக்கப்பட்டவர்களுக்கு செய்யவேண்டிய பேருதவி ,  அவர்களின் புகைப்படங்களை எதிலும் பதிவேற்றம் செய்யாமலும் ,தகவல்களை விருப்பப்படி சித்தரித்து வதந்திகளாய் மாற்றாமல் இருந்தாலே போதுமானது!